Daily interviews

សន្និបាតគណៈកម្មាធិការកណ្តាលរបស់គណបក្សប្រជាជនកម្ពុជាលើកទី៤៥ ក្នុងរយៈពេល២ថ្ងៃបានបិទបញ្ចប់នៅល្ងាចថ្ងៃអាទិត្យទី២៦ មករានេះ។ នាឱកាសនោះ បក្សប្រជាជនកម្ពុជាបានវាយតម្លៃលើវិស័យសេដ្ឋកិច្ច សង្គម នយោបាយ និងទំនាក់ទំនងការបរទេសថា មានភាពល្អប្រសើរ និងខ្ពស់ត្រដែតលើឆាកអន្តរជាតិ។ នៅក្នុងកិច្ចសម្ភាសជាមួយវិទ្យុបារាំងអន្តរជាតិនាថ្ងៃអាទិត្យទី២៦ មករានេះ លោក សុខ ឥសាន អ្នកនាំពាក្យគណបក្សប្រជាជនកម្ពុជាបានបញ្ជាក់ថា សន្និបាតបានវាយតម្លៃនូវជោគជ័យខ្ពស់របស់រដ្ឋាភិបាលឈាមថ្មីដែលទើបចេញដំណើរបាន ១ឆ្នាំ និង៧ខែ។

ក្រសួងធនធានទឹក និងឧត្តុនិយមកំពុងបន្តបូមទឹកពីទន្លេបាទីបញ្ចូលទៅកាន់ប្រឡាយប្រវែង១៨គីឡូម៉ែត្រ ដើម្បីជួយសង្គ្រោះស្រូវប្រជាពលរដ្ឋជាង ៤ពាន់ហិចតាស្ថិតក្នុងស្រុកបាទីខេត្តតាកែវ ដែលប្រឈមនឹងការខ្វះទឹក។ នៅក្នុងកិច្ចសម្ភាសជាមួយវិទ្យុបារាំង RFI នាថ្ងៃទី២៤ ខែមករា ឆ្នាំ២០២៥ នេះ លោក អឿង ចន្ថា អនុរដ្ឋលេខាធិការ និងជាអ្នកនាំពាក្យក្រសួងធនធានទឹកបានថ្លែងថា នៅសប្តាហ៍ក្រោយ ក្រសួងនឹងអនុញ្ញាតឲ្យពលរដ្ឋប្រើប្រាស់ទឹកព្រមៗគ្នានៅពេលដែលទឹកត្រូវបានបូមពេញប្រឡាយ។ ក្នុងន័យនេះ លោក អឿង ចន្ថា ស្នើឲ្យពលរដ្ឋកុំបារម្ភពីការខូចខាតដំណាំស្រូវ។

លោក នេត្រ ភក្ត្រា រដ្ឋមន្ត្រីក្រសួងព័ត៌មានបានបញ្ជាក់នៅក្នុងសន្និបាតបូកសរុបលទ្ធផលការងារឆ្នាំ២០២៤ នាថ្ងៃទី២១ មករាថា ក្រសួងមានគម្រោងដកអាជ្ញាបណ្ណសារព័ត៌មានទាំងឡាយណាដែលសម្ភាសប្រភពស្ថិតក្នុងស្ថានភាពមិនប្រក្រតី តួយ៉ាងក្នុងស្ថានភាពញៀនថ្នាំ ឬគ្រឿងស្រវឹង។ នៅក្នុងកិច្ចសម្ភាសជាមួយវិទ្យុបារាំងអន្តរជាតិ RFI នាថ្ងៃទី២២ មករានេះ លោក ណុប វី នាយកប្រតិបត្តិសម្ព័ន្ធអ្នកសារព័ត៌មានកម្ពុជា ហៅកាត់ ខេមបូចា យល់ថា គម្រោងរបស់លោក នេត្រ ភក្ត្រា នឹងធ្វើឲ្យប៉ះពាល់ធ្ងន់ធ្ងរដល់សេរីភាពសារព័ត៌មាននៅកម្ពុជាដែលកំពុងតែរួមតូចស្រាប់។ តាមលោកណុប វី ក្រសួងគួរអប់រំជាជាងព្រមានដកអាជ្ញាបណ្ណ។

នៅថ្ងៃទី២១ ខែមករា ឆ្នាំ២០២៥នេះ កសិករជាច្រើននាក់មកពីឃុំចំនួន៥ ស្ថិតនៅក្នុងស្រុកបាទី ខេត្តតាកែវ បាននាំគ្នាបិទផ្លូវជាតិលេខ២ ដើម្បីជំរុញឲ្យអាជ្ញាធរពាក់ព័ន្ធជួយដោះស្រាយរឿងខ្វះទឹកដើម្បីសង្គ្រោះស្រូវប្រាំងរបស់ពួកគេ។ នៅក្នុងកិច្ចសម្ភាសជាមួយវិទ្យុបារាំងអន្តរជាតិ RFI នាថ្ងៃទី២១ ខែមករា ឆ្នាំ២០២៥នេះ លោក វ៉ី សំណាង អភិបាលខេត្តតាកែវបានបញ្ជាក់ថា អាជ្ញាធរខេត្តតាកែវ និងអង្គភាពពាក់ព័ន្ធបានជួយអន្តរាគមន៍ឆ្លើយតបនឹងសំណូមពររបស់កសិករហើយ។ តាមលោកអភិបាលខេត្ត កង្វះទឹកដោយសារតែកសិករបានធ្វើស្រែលើសពីផែនការកំណត់ដល់ទៅពីរដង ខណៈអាជ្ញាធរបានជូនដំណឹងពីដើមរដូវថា អាជ្ញាធរមានការអភិវឌ្ឍន៍ប្រព័ន្ធធារាសាស្ត្រផ្នែកខាងលើឲ្យប្រសើរឡើង៕

លោកលិម គិមយ៉ា អតីតអ្នកតំណាងរាស្រ្តបក្សប្រឆាំងត្រូវបានខ្មាន់កំាំភ្លើងជាជនជាតិថៃឈ្មោះអេកាឡាក់ ភាណយបាញ់សម្លាប់កាលពីថ្ងៃទី៧ មករាក្នុងក្រុងបាងកក ប្រទេសថៃ។ កាលពីថ្ងៃទី១៦ មករា សហគមន៍ខ្មែរនៅប្រទេសបារាំងបានរៀបចំពិធីបុណ្យសពរំលឹកវិញ្ញាណក្ខន្ធលោកលិម គិមយ៉ានៅក្នុងវត្តពោធិវង្សស្ថិតជាយក្រុងប៉ារីស។ នៅក្នុងឱកាសនោះ លោកស្រីលិម អានម៉ារីហៅអានីដែលជាភរិយាលោកលិម គិមយ៉ាបានផ្តល់សម្ភាសឲ្យវិទ្យុបារាំងអន្តរជាតិដែលបានចុះទៅយកការណ៍ផ្ទាល់នៅក្នុងពិធីបុណ្យនោះ។ លោកស្រីអានម៉ារីបានរៀបរាប់ពីហេតុការណ៍ដែលខ្មាន់កាំភ្លើងធ្វើឃាតស្វាមី និងថា លោកស្រីមានជំនឿ និងទំនុកចិត្តលើប្រព័ន្ធយុត្តិធម៌បារាំង និងថៃជាងប្រព័ន្ធយុត្តិធម៌កម្ពុជា ដើម្បីស្វែងរកយុត្តិធម៌ឲ្យលោកលិម គិមយ៉ា។

មន្ត្រីជំនាញរបស់មជ្ឈមណ្ឌលកំចាត់មីនកម្ពុជា(CMAC) ចំនួន២រូប បានបាត់បង់ជីវិតដោយការផ្ទុះគ្រាប់មីនតោនកាលពីថ្ងៃទី១៦ ខែមករា ឆ្នាំ២០២៥ ក្នុងពេលបំពេញការងារនៅស្រុកត្រពាំងប្រាសាទ ខេត្តឧត្តរមានជ័យ។ នៅក្នុងកិច្ចសម្ភាសជាមួយវិទ្យុបារាំងអន្តរជាតិ RFI នាថ្ងៃទី១៧ ខែមករា ឆ្នាំ២០២៥ នេះ លោក ហេង រតនា ប្រតិភូរាជរដ្ឋាភិបាលទទួលបន្ទុកអគ្គនាយកនៃមជ្ឈមណ្ឌល CMAC បានសម្តែងការសោកស្តាយចំពោះការបាត់បងជីវិតយុទ្ធជនរបស់លោក ដែលជាធនធានមនុស្សជំនាញ។ តាមលោក ហេង រតនា កម្ពុជានៅតែប្រឈមនឹងគ្រោះថ្នាក់ដោយសារគ្រាប់មីន ដែលបានសម្លាប់មន្ត្រីជំនាញរបស់ CMAC ចំនួន១៨នាក់ រងរបួសជាង៨០នាក់ និងពលរដ្ឋប្រមាណ ៦ម៉ឺននាក់បានរងគ្រោះគិតចាប់តាំងពីជាង៣០ឆ្នាំកន្លងទៅនេះ៕

ក្រុមប្រឹក្សាអភិវឌ្ឍន៍កម្ពុជាបានប្រកាសនៅថ្ងៃទី១៣ មករាថា ក្នុងឆ្នាំ២០២៤ កម្ពុជាបានអនុម័តគម្រោងវិនិយោគសរុបចំនួន ៤១៤គម្រោងដែលជាចំនួនបំបែកកំណត់ត្រាប្រចាំឆ្នាំ។ ចិននៅតែជាវិនិយោគិនបរទេសឈរលេខរៀងទី១ នៅកម្ពុជា ពោលមានចំនួន ៤៩.៨២% ក្នុងចំនួនវិនិយោគិនបរទេសសរុប។ ក្នុងបទសម្ភាសជាមួយវិទ្យុបារាំងអន្តរជាតិ RFI នាថ្ងៃទី១៦ មករានេះ លោកបណ្ឌិត ហុង វណ្ណៈ អ្នកជំនាញសេដ្ឋកិច្ចនៃវិទ្យាស្ថានទំនាក់ទំនងអន្តរជាតិនៃរាជបណ្ឌិតសភាកម្ពុជាកត់សម្គាល់ថា វិនិយោគិនចិនកាន់តែច្រើនមកវិនិយោគនៅកម្ពុជាក៏ព្រោះតែពួកគេមើលឃើញឱកាស និងបូកផ្សំជាមួយទំនាក់ទំនងស្អិតរមួតរវាងកម្ពុជា និងចិន។

នៅថ្ងៃទី១៥ ខែមករា ឆ្នាំ២០២៥ នេះ សាលាខណ្ឌមានជ័យ និងសាលាខណ្ឌដង្កោបាននិមន្តព្រះសង្ឃជាច្រើនអង្គធ្វើពិធីសូត្រមន្តរំដោះគ្រោះនៅលើផ្លូវ៦០ម៉ែត្រ។ ពិធីសាសនានេះធ្វើឡើង ក្រោយមានគ្រោះថ្នាក់ចរាចរណ៍ញឹកញាប់ ដែលភាគច្រើនបណ្តាលមកពីការបើកបរលើសល្បឿនកំណត់។ នៅក្នុងកិច្ចសម្ភាសជាមួយវិទ្យុបារាំងអន្តរជាតិ RFI នាថ្ងៃទី១៥ ខែមករានេះ លោកស្រី ដោ សម្ផស្ស អ្នកនាំពាក្យសាលារាជធានីភ្នំពេញបានថ្លែងថា ពិធីសាសនានេះធ្វើឡើងដើម្បីរំងាប់អារម្មណ៍ពលរដ្ឋ និងក៏ជាជំនឿក្នុងការជំរះគ្រោះចង្រៃតាមប្រពៃណីផងដែរ។ តាមលោកស្រី ដោ សម្ផស្ស សមត្ថកិច្ចនឹងពង្រឹងការអនុវត្តន៍ច្បាប់ចរាចរណ៍បន្ថែមទៀត ក្រោយដាក់កាម៉េរាចាប់ល្បឿនរួចរាល់៕

ថ្មីៗ​នេះ ប្រជា​កសិករ​នៅ​ស្រុក​មោង​ឬស្សី ខេត្ត​បាត់​ដំបង​បាន​នាំ​គ្នា​តវ៉ា​ដោយបិទ​កំណាត់​ផ្លូវ​ជាតិ​៥ ​ដើម្បី​ស្នើ​ឲ្យ​រដ្ឋា​ភិបាល​ជួយ​រក​ទីផ្សារ​លក់​ស្រូវ​ដែល​ពួក​គេ​ទើប​ប្រមូល​បាន​នៅ​ដើម​ឆ្នាំ​២០២៥​ នេះ​។​ រដ្ឋ​មន្ត្រី​ក្រសួង​កសិកម្ម​អះ​អាង​ថា កង្វះ​ទី​ផ្សារ​លក់​ស្រូវ​ពេល​នេះ​ដោយ​សារ​តែ​កសិករ​សម្រុក​ដាំ​ស្រូវ​ OM ​ដែល​ជា​ពូជ​នាំ​ចូល​ពី​បរទេស​ (វៀតណាម)​។​ តាម​អ្នក​ជំនាញ​ ពូជ​ស្រូវ​ OM​ នេះ​គឺ​សម្រាប់​តែ​នាំ​ចេញ​ទៅ​វៀត​ណាម​។ តែ​ដោយ​វៀត​ណាម​មិន​ចូល​ទិញ​ ឆ្នាំ​នេះក៏​ធ្វើ​ឲ្យ​ស្រូវ​របស់​កសិករ​ខ្មែរ​ត្រូវ​កក​ស្ទះ។​ ក្នុង​បទ​សម្ភាសជា​មួយ​វិទ្យុ​បារាំង​អន្តរ​ជាតិ RFI នៅ​ថ្ងៃ​ទី​១៤ ខែ​មករា​ លោក ប្រាក់ សេរីវឌ្ឍន៍ ប្រធាន​វិទ្យា​ស្ថាន​ស្រាវ​ជ្រាវ​ និង​អភិវឌ្ឍន៍​ជន​បទ​កម្ពុជា(CIRD)​ បញ្ជាក់​ថា​ ការ​ដាំ​ពូជ​ស្រូវ ​OM​ ពិត​ជា​ទទួល​បាន​ទិន្នផល​ខ្ពស់​ តែ​ត្រូវ​ពឹង​លើ​ឈ្មួញ​បរទេស​ដើម្បី​លក់​ចេញ​៕

លទ្ធផលជំរឿនឆ្នាំ២០២៣ ដែលចេញផ្សាយដោយអង្គការជីវិតធម្មជាតិនៅកម្ពុជាបង្ហាញថា សត្វក្រៀលនៅសល់តែ ១៨០ក្បាលប៉ុណ្ណោះ។ តែដើម្បីជួយបង្កើនសត្វក្រៀលឡើងវិញ អង្គការជីវិតធម្មជាតិនៅកម្ពុជាបានសហការជាមួយកសិករនៅក្នុងតំបន់អន្លង់ព្រីង ស្រុកកំពង់ត្រាច ខេត្តកំពតដោយបង្កើត«គម្រោងស្រូវមិត្តក្រៀល»ក្នុងឆ្នាំ២០១៩។ ជាគម្រោងដែលជំរុញឲ្យមានការដាំដុះពូជស្រូវដែលសត្វក្រៀលចូលចិត្តស៊ីដោយមិនប្រើថ្នាំគីមីកសិកម្ម ឬជីគីមីកសិកម្ម។ នៅក្នុងកិច្ចសម្ភាសន៍ជាមួយវិទ្យុបារាំងអន្តរជាតិ RFI នាថ្ងៃទី១៣ ខែមករា ឆ្នាំ២០២៥នេះ លោក ឆេង មករា អគ្គនាយកក្រុមហ៊ុនដាវ៉ាន់បានឲ្យដឹងថា បើមានការគាំទ្រពីមហាជនដល់«អង្ករមិត្តក្រៀល» នោះសត្វក្រៀលនៅកម្ពុជានឹងស្ថិតនៅគង់វង្សយូរអង្វែង៕

ក្នុងឆ្នាំ២០២៤ កម្ពុជាប្រមូលទិន្នផលគ្រាប់ស្វាយចន្ទីឆៅបានចំនួន ៨៥០ ០០០ តោនដែលភាគច្រើននាំចេញទៅបរទេស ក្នុងនោះមាន ៧៩៥ ០០០តោននាំទៅវៀតណាម។ក្នុងបទសម្ភាសជាមួយវិទ្យុបារាំងអន្តរជាតិ RFI នៅថ្ងៃទី១០ មករា លោក អួន ស៊ីឡុតប្រធានសមាគមស្វាយចន្ទីកម្ពុជាលើកឡើងថា គ្រាប់ស្វាយចន្ទីខ្មែរមានគុណភាព និងគ្រាប់មានទំហំធំ តែបញ្ហានៅត្រង់ថា កម្ពុជានៅមិនទាន់មានលទ្ធភាពកែច្នៃគ្រាប់ស្វាយចន្ទីស្រស់ទៅជាផលិតផលសម្រេចដើម្បីនាំចេញបាននៅឡើយ។ ត្រង់ចំណុចនេះត្រូវបានលោក អួន ស៊ីឡុតបញ្ជាក់ថា គឺមកពីសហគ្រាសកែច្នៃគ្រាប់ស្វាយចន្ទីគ្មានទុនបង្វិល ខណៈថ្លៃដើមផលិតវិញមានតម្លៃខ្ពស់កប់ពពក។

ឃាតកម្មលើ លោក លិម គិមយ៉ា អតីតតំណាងរាស្ត្រនៃអតីតគណបក្សសង្គ្រោះជាតិនៅក្រុងបាងកក ប្រទេសថៃ កាលពីថ្ងៃទី០៧ ខែមករា ឆ្នាំ២០២៥ បានក្លាយជាករណីព្រហ្មទណ្ឌឆ្លងដែនដ៏កម្រមួយ និងជាប្រធានបទសំខាន់ ដែលមានការចាប់អារម្មណ៍ច្រើនពីមហាជន និងអ្នកសិក្សាផ្នែកច្បាប់នៅកម្ពុជា។ ចាប់អារម្មណ៍ ព្រោះជនរងគ្រោះមានសញ្ជាតិខ្មែរ និងបារាំង ទីតាំងកើតហេតុស្ថិតក្នុងប្រទេសថៃ ជនសង្ស័យខ្មាន់កាំភ្លើង ដែលជាជនជាតិថៃបានរត់គេចចូលទឹកដីខ្មែរ និងត្រូវបានចាប់ខ្លួនក្នុងទឹកដីខ្មែរ។ នៅក្នុងកិច្ចសម្ភាសជាមួយវិទ្យុបារាំង RFI នាថ្ងៃទី១០ ខែមករា ឆ្នាំ២០២៥ លោក សុក សំអឿន ទីប្រឹក្សាច្បាប់មេធាវីអមរិន្ទបញ្ជាក់ថា តុលាការកម្ពុជា តុលាការថៃ និងតុលាការបារាំងមានសមត្ថកិច្ចកាត់ក្តីដូចគ្នាលើឃាតកម្មលោក លិម គិមយ៉ា៕

ចាប់ពីថ្ងៃទី១ មករា ២០២៥ ប្រាក់ឈ្នួលអប្បបរមាកម្មករក្នុងវិស័យកាត់ដេរនឹងទទួលបានចំនួន ២០៨ដុល្លារក្នុងមួយខែ។ នៅក្នុងបទសម្ភាសជាមួយវិទ្យុបារាំងអន្តរជាតិ RFI នាថ្ងៃព្រហស្បតិ៍ ទី៩ មករានេះ លោក កត្តា អ៊ន អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈបញ្ជាក់ថា ប្រាក់ឈ្នួល ២០៨ដុល្លារជាកម្រិតប្រាក់ឈ្នួលមួយខ្ពស់សម្រាប់ការចាយវាយរបស់កម្មករ បើប្រៀបធៀបជាមួយបណ្តាប្រទេសក្នុងតំបន់។ តែលោកមិនភ្លេចបញ្ជាក់ថា ក្រសួងពិតជាយល់ច្បាស់ថាកម្មករចង់បានប្រាក់ខែច្រើនជាងនេះ ហើយក្រសួងក៏ត្រូវការថ្លឹងថ្លែងពីកត្តាសេដ្ឋកិច្ចជាតិ និងអន្តរជាតិដែរ។

ក្រសួងបរិស្ថានបានចាប់ផ្តើមបើកយុទ្ធនាការកាលពីថ្ងៃទី០១ ខែមករា ឆ្នាំ២០២៥ ដើម្បីសម្អាតផ្លវជាតិក្រោមប្រធានបទ«ផ្លូវជាតិគ្មានសំរាមប្លាស្ទិក»។ នៅក្នុងកិច្ចសម្ភាសជាមួយវិទ្យុបារាំងអន្តរជាតិ RFI នាថ្ងៃទី០៨ ខែមករា ឆ្នាំ២០២៥ នេះ លោក ខ្វៃ អាទិត្យា អនុរដ្ឋលេខាធិការ និងជាអ្នកនាំពាក្យក្រសួងបរិស្ថានបានប្រាប់ឲ្យដឹងថា យុទ្ធនាការនេះនឹងប្រែក្លាយផ្លូវជាតិនៅទូទាំងប្រទេសកម្ពុជាពីកន្លែងបោះសំរាមចោលយ៉ាងអាណាធិបតេយ្យទៅជាផ្លូវជាតិដែលមានបរិស្ថាន និងអនាម័យល្អប្រកបដោយសោភណភាព។

ប៉ុន្មាន​ថ្ងៃ​កន្លង​ទៅ​នេះ ​កសិករ​នៅ​ខេត្ត​បាត់​ដំបង​បាន​អំពាវ​នាវ​តាម​បណ្តាញ​សង្គម​ឲ្យ​រដ្ឋា​ភិបាល​ជួយ​អន្តរាគមន៍​រក​ទី​ផ្សារ​ស្រូវ​ ខណៈ​ស្រូវ​ដែល​ប្រមូល​រួច​គ្មាន​ទី​ផ្សារ ​និង​ត្រូវ​បាន​ឈ្មួញ​ក្នុង​ស្រុក​ទម្លាក់​តម្លៃ​។ នៅក្នុង​បទសម្ភាស​ជា​មួយ​វិទ្យុ​បារាំង​អន្តរ​ជាតិ RFI នា​ថ្ងៃ​ទី​៧ មករា ឆ្នាំ​២០២៥ ​ឧកញ៉ា ភូ ពុយ ម្ចាស់​រោង​ម៉ាស៊ីន​កិន​ស្រូវ​ បៃតង​កម្ពុជា ​បាន​បញ្ជាក់​ថា ស្រូវ​របស់​កសិករ​នៅ​ខេត្ត​បាត់​ដំបង​ដែល​កំពុង​ធ្លាក់​ថ្លៃ ​និងកក​ស្ទះមិន​អាច​លក់​ចេញ​បាន​ពេល​នេះ គឺដោយ​សារ​ឈ្មួញ​វៀត​ណាម​មិន​ចូល​មក​ទិញ​ដូច​រាល់​ឆ្នាំ។​ ឧកញ៉ា ភូ ពុយ ថា​រោង​ម៉ាស៊ីន​កិន​ស្រូវ​របស់​លោក​ទិញ​ស្រូវ​សម្រាប់​តែ​កិន​ជា​អង្ករ​ដើម្បី​នាំ​ចេញ​តែប៉ុណ្ណោះ និង​ថា ស្រូវ​ដែល​កសិករ​លក់​មិន​ចេញ​ពេល​នេះ​ជា​ប្រភេទ​ស្រូវ​«នាងខុន»​ ដែល​កន្លង​មក​ពឹងទាំង​ស្រុង​លើ​ឈ្មួញពី​វៀត​ណាម​៕

គណបក្សប្រជាជនកម្ពុជាត្រៀមប្រារព្ធពិធីដ៏ធំមួយនៅថ្ងៃទី០៧ ខែមករា ឆ្នាំ២០២៥ នៅកោះពេជ្រ ដើម្បីអបអរខួប៤៦ឆ្នាំ ថ្ងៃជ័យជម្នះលើរបបប្រល័យពូជសាសន៍ដោយមានអ្នកចូលរួមប្រមាណ៥ម៉ឺននាក់។ នៅក្នុងកិច្ចសម្ភាសជាមួយវិទ្យុបារាំងអន្តរជាតិ RFI នាថ្ងៃទី០៦ ខែមករា ឆ្នាំ២០២៥នេះ លោក សុខ ឥសាន អ្នកនាំពាក្យគណបក្សប្រជាជនកម្ពុជាបានប្រាប់ឲ្យដឹងថា ការប្រារព្ធពិធីថ្ងៃ៧ មករា ត្រូវធ្វើឡើងដូចសព្វមួយដង ដោយមានការចូលរួមពីតំណាងស្ថានទូតនានា ដែលមានទំនាក់ទំនងការទូតជាមួយកម្ពុជា។ លោក សុខ ឥសាន ក៏បានបន្ថែមដែរថាគណបក្សនយោបាយ ដែលជាសម្ព័ន្ធភាពរបស់គណបក្សប្រជាជនក៏ត្រូវបានអញ្ជើញឲ្យចូលរួម ព្រមទាំងស្វាគមន៍ដល់គណបក្សប្រឆាំងផងដែរ ប្រសិនបើពួកគេចង់ចូលរួម៕

ចាប់ពីថ្ងៃទី០៥ ខែមករា ឆ្នាំ២០២៥ ទៅប៉ុន្មានថ្ងៃខាងមុខ សីតុណ្ហភាពអប្បបរមានៅក្នុងប្រទេសកម្ពុជានឹងចុះត្រជាក់ខ្លាំងរហូតដល់ ១៣អង្សារសេ។ នៅក្នុងកិច្ចសម្ភាសជាមួយវិទ្យុបារាំងអន្តរជាតិ RFI នៅថ្ងៃទី០៣ ខែមករា ឆ្នាំ២០២៥នេះ លោក ចាន់ យុត្ថា រដ្ឋលេខាធិការ និងជាអ្នកនាំពាក្យក្រសួងធនធានទឹក និងឧត្តុនិយម បានឲ្យដឹងថាអាកាសធាតុនៅរដូវរំហើយ ឬរដូវរងារនៅឆ្នាំនេះត្រជាក់ខ្លាំងជាងឆ្នាំកន្លងទៅ។ តែលោកថា មិនមែនជាទូទៅទេ ពោលគឺការចុះត្រជាក់ខ្លាំង ភាគច្រើននៅតំបន់ជួរភ្នំ តំបន់ខ្ពង់រាប និងខេត្តមួយចំនួន។

រហូតមកដល់ពេលនេះ គណបក្សកម្លាំងជាតិនៅបន្តរក្សាភាពស្ងៀមស្ងាត់ ខណៈលោក ស៊ុន ចន្ធីដែលជាប្រធានគណបក្សត្រូវបានតុលាការកាត់ទោសឲ្យជាប់ពន្ធនាគារចំនួន២ឆ្នាំ។ នៅក្នុងបទសម្ភាសជាមួយវិទ្យុបារាំងអន្តរជាតិ RFI នាថ្ងៃព្រហស្បតិ៍ ទី២ មករា ឆ្នាំ ២០២៥ នេះ លោកសុខ គឹមសេង អនុប្រធានគណបក្សកម្លាំងជាតិបានទទួលស្គាល់ថា ការកាត់ទោសលោក ស៊ុន ចន្ធីបានប៉ះពាល់ដល់ដំណើរការរបស់គណបក្ស តែគណបក្សនៅតែបន្តគោលជំហរឈានឆ្ពោះទៅរកការបោះឆ្នោត និងកំពុងពិចារណារៀបចំសមាជដើម្បីរើសប្រធានថ្មី នៅពេលសាលក្រម កាត់ទោស លោក ស៊ុន ចន្ធីចប់ជាស្ថាពរ។

ផ្ទះសំណាក់ និងបឹងកាឡូនៅលើកោះរ៉ុងពេញទៅដោយទេសចរជាតិ និងអន្តរជាតិអំឡុងពេលឆ្លងឆ្នាំសកល ២០២៥ កាលពីយប់ថ្ងៃអង្គារ ទី៣១ ធ្នូ ឆ្នាំ ២០២៤។ នៅក្នុងកិច្ចសម្ភាសជាមួយវិទ្យុបារាំងអន្តរជាតិ RFI លោក នួន ប៊ុនថុល អភិបាលក្រុងកោះរ៉ុង ដែលជាដែនដីមួយស្ថិតក្នុងរដ្ឋបាលខេត្តព្រះសីហនុបានឲ្យដឹងថា ភ្ញៀវទេសចរជាតិ និងអន្តរជាតិជិត១ម៉ឺននាក់ បានជ្រើសរើសកោះរ៉ុងជាទីតាំងដ៏ពិសិដ្ឋសម្រាប់អបអរឆ្នាំសកល ២០២៥។ តែលោកមិនភ្លេចបញ្ជាក់ថា កន្លែងស្នាក់នៅ នៅមិនទាន់អាចឆ្លើយតបនឹងចំនួនទេសចរដ៏ច្រើនសន្ធឹកសន្ធាប់ ដែលទាមទារឲ្យមានការចូលរួមកសាងបន្ថែមទៀតពីសំណាក់ម្ចាស់កម្មសិទ្ធិដីធ្លីលើកោះរ៉ុង និងពីសំណាក់វិនិយោគិនបរទេស៕

លោកឡុង ឌីម៉ង់ អភិបាលរង និងជាអ្នកនាំពាក្យសាលាខេត្តព្រះសីហនុបានប្រាប់វិទ្យុបារាំងអន្តរជាតិ RFI នៅថ្ងៃអង្គារ ទី៣១ ធ្នូនេះថា រដ្ឋបាលខេត្តបានត្រៀមរៀបចំរួចរាល់សម្រាប់ការអបអរពិធីបុណ្យឆ្លងឆ្នាំសកល ២០២៥។ តាមលោកឡុង ឌីម៉ង់ បណ្តាឆ្នេរកោះនានាត្រូវបានរៀបចំតុបតែងលម្អយ៉ាងស្រស់ស្អាតដើម្បីត្រៀមទទួលភ្ញៀវទេសចរជាតិ និងអន្តរជាតិដោយបន្ថែមថា រដ្ឋបាលខេត្តក៏បានត្រៀមកម្លាំងសមត្ថកិច្ចសម្រាប់ត្រួតពិនិត្យសន្តិសុខ និងការពារសុវត្ថិភាពយ៉ាងយកចិត្តទុកដាក់ដែរ។ ក្រៅពីនេះ និងបើតាមអភិបាលរងខេត្តព្រះសីហនុរូបនេះដដែល ភ្ញៀវទេសចរជាច្រើនបានមកកម្សាន្តនៅក្នុងខេត្តព្រះសីហនុ ហើយសណ្ឋាគារ រួមទាំងផ្ទះសំណាក់ត្រូវបានកក់ពេញស្ទើរតែគ្រប់កន្លែង។ តាមលោកឡុង ឌីម៉ង់ ចំនួនភ្ញៀវទេសចរមកលេងខេត្តព្រះសីហនុមានសឹងប្រហាក់ប្រហែល ឬអាចលើសពីចំនួនភ្ញៀវទេសចរមុននឹងជំងឺកូវីដ១៩ទៅទៀត។ សូមស្តាប់ប្រសាសន៍លោកឡុង ឌីម៉ង់៖