Daily interviews

សៀវភៅមានចំណងជើង «សំឡេងស្វែងរកយុត្តិធម៌ចេញពីផ្នូរសពរួមដែលមិនមែនជាការសងសឹក» សរសេរ និងចងក្រងដោយលោក កង ឫទ្ធិគិរី អតីតសាស្រ្តចារ្យ និងជាអតីតមេធាវីការពារក្តីឲ្យមេដឹកនាំខ្មែរក្រហមក្នុងអង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក.)។ ក្នុងបទសម្ភាសជាមួយវិទ្យុបារាំងអន្តរជាតិ RFI លោក កង ឫទ្ធិគិរីលើកឡើងថា សៀវភៅរបស់លោកឆ្លុះបញ្ចាំងពីការពិតក្នុងរបបខ្មែរក្រហមត្រូវបានចងក្រងដោយឯកសារច្បាប់ជាតិ និងអន្តរជាតិ។ សម្រាប់លោក កង ឫទ្ធិគិរី កម្ពុជាពិតជាត្រូវការសៀវភៅប្រវត្តិសាស្ត្រដែលឆ្លុះបញ្ចាំងពីការពិតដោយមិនភ្ជាប់និន្នាការនយោបាយ ខណៈសៀវភៅប្រវត្តិសាស្ត្រភាគច្រើនត្រូវបានចងភ្ជាប់ជាមួយនិន្នាការនយោបាយ។

នៅថ្ងៃទី២ ខែមេសា ឆ្នាំ២០២៥ ត្រូវជាព្រឹកថ្ងៃទី៣ មេសានៅកម្ពុជា ប្រធានាធិបតីអាមេរិក លោក ដូណាល់ ត្រាំ បានសម្រេចដំឡើងពន្ធលើទំនិញនាំចូលពីកម្ពុជាចំនួន៤៩% ដែលជាអត្រាពន្ធដ៏ខ្ពស់ជាងគេក្នុងចំណោមប្រទេសនៅអាស៊ីអាគ្នេយ៍។ វិធានការដំឡើងពន្ធនេះនឹងចូលជាធរមាននៅថ្ងៃទី៩ ខែមេសា ឆ្នាំ២០២៥។ នៅក្នុងកិច្ចសម្ភាសនជាមួយវិទ្យុបារាំង RFI នាថ្ងៃទី០៣ ខែមេសា ឆ្នាំ២០២៥នេះ លោក ម៉ី កល្យាណ ទីប្រឹក្សាជាន់ខ្ពស់នៃឧត្តមក្រុមប្រឹក្សាសេដ្ឋកិច្ចជាតិ និងជាប្រធានក្រុមប្រឹក្សាភិបាលនៃសមាគមពាណិជ្ជកម្ម និងវិនិយោគកម្ពុជា-ជប៉ុន មើលឃើញថា បើសហរដ្ឋអាមេរិកដំឡើងពន្ធលើទំនិញកម្ពុជាដូចបានលើកឡើងមែន នោះវានឹងមានផលប៉ះពាល់ធំធេងគួរឲ្យព្រួយបារម្ភយ៉ាងខ្លាំង។

ថ្ងៃទី​៩ ខែ​មេសា គឺ​ជា​ទិវា​ជាតិ​លើក​កម្ពស់​ការ​ប្រើប្រាស់​ផលិតខ្មែរ​លើក​ទី​៨​។ ​មុន​ទិវា​នេះឈាន​មក​ដល់​ រដ្ឋា​ភិបាល​កម្ពុជា​បាន​ចេញ​សារ​លិខិត​មួយ​ដោយ​ជំរុញ​ឲ្យ​ពលរដ្ឋ​នាំ​គ្នាគាំ​ទ្រ​ផលិត​ផល​ខ្មែរ​ដើម្បី​ជា​មោទនភាព​ជាតិ​។​ លោក ប្រាក់ សេរីវឌ្ឍន៍ តំណាង​ស្ថាប​និក សមាគម​អ្នក​ប្រើប្រាស់​វិស័យ​សុវត្ថិភាព​អាហារ​ (ស.ប.ស.អ) យល់ថា ការ​គាំទ្រ​ផលិតផល​ខ្មែរ​បាន​ជួយ​ដល់​សង្គម និង​សេដ្ឋកិច្ច​។​ តែ​លោក​កត់​សម្គាល់​ឃើញ​ពី​បញ្ហា​ប្រឈម​មួយ​ចំនួន​ដែល​កម្ពុជា​នៅខ្វះលទ្ធភាព​ផលិត​ដើម្បី​ផ្គត់ផ្គង់​តម្រូវ​ការ​ និង​ខ្វះការ​យល់​ដឹង​ពី​ការ​គាំទ្រ​ផលិត​ផល​ខ្មែរ​។

លោក ថេ ឈុនហាក់ អគ្គនាយក​នៃ​អគ្គនាយក​ដ្ឋាន​សមភាព​យេនឌ័រ និង​អភិវឌ្ឍន៍​សេដ្ឋកិច្ច​នៃ​ក្រសួង​កិច្ចការ​នារី​ បាន​ថ្លែង​ថា កម្ពុជា​មាន​ភាព​ប្រសើរ​ឡើង​ក្នុង​ការ​ដោះស្រាយ​បញ្ហា​វិសមភាពយែ​នឌ័រ​ដែល​ត្រូវ​បាន​ទទួល​ស្គាល់​ដោយភាគី​ពាក់ព័ន្ធ​នៅក្នុង​កិច្ច​ប្រជុំ​មួយ​នៅអង្គការ​សហ​ប្រជាតិ​កាល​ពី​ពាក់​កណ្តាល​ខែ​មីនា ឆ្នាំ​២០២៥​។​ ក្នុង​បទ​សម្ភាស​ជាមួយ​វិទ្យុ​បារាំង​អន្តរ​ជាតិ​ RFI នៅ​ថ្ងៃ​ទី​១ ខែ​មេសា លោក ថេ ឈុនហាក់ បាន​អះអាង​ថា ភាព​ប្រសើរ​នៃ​ស្ថាន​ភាព​យែន​ឌ័រ​នៅ​កម្ពុជា គឺ​ដោយសារ​តែ​កម្ពុជា​មាន​គោល​នយោបាយ​គាំពារ​ស្ត្រី ​និង​សមភាព​យែន​ឌ័រ​។​ តែ​លោក​ក៏​ទទួល​ស្គាល់​ថា កម្ពុជា​នៅ​មាន​បញ្ហា​ជា​ច្រើន​ទៀត​ដែល​ត្រូវ​ឆ្លើយ​តប​នឹង​បញ្ហា​យែន​ឌ័រ​។

ហេតុការណ៍នៃការរញ្ជួយដីនៅប្រទេសថៃកាលពីថ្ងៃសុក្រ ទី២៨ មីនាបានបណ្តាលឲ្យអគារខ្ពស់មួយដែលកំពុងសាងសង់បាក់រលំទាំងស្រុង។ ព្រឹត្តិការណ៍បាក់រលំអគារនេះបានបណ្តាលឲ្យស្លាប់កម្មករមួយចំនួន និងខ្លះទៀតរងរបួសធ្ងន់ ស្រាល។ ក្នុងចំណោមកម្មករសំណង់ដែលរងរបួសក៏មានជនជាតិខ្មែរ គឺអ្នកស្រី សឿន សំណាង។ ក្នុងបទសម្ភាសជាមួយវិទ្យុបារាំងអន្តរជាតិ RFI នៅថ្ងៃចន្ទ ទី៣១ មីនានេះ អ្នកស្រី សឿន សំណាងបានរៀបរាប់ពីស្ថានភាពអគារដែលរញ្ជួយខ្លាំងមុនពេលបាក់ស្រុត និងដែលអ្នកស្រីត្រូវបានបំណែកថ្មធ្លាក់សង្កត់កែងជើងរបួសធ្ងន់។ តែពេលនេះ អ្នកស្រីបានត្រឡប់មកកម្ពុជា តែគ្មានលទ្ធភាពទៅព្យាបាលនៅមន្ទីរពេទ្យ។

ក្នុងឱកាសចូលឆ្នាំខ្មែរចាប់ពីថ្ងៃទី ១៤-១៦ មេសាខាងមុខ​ សហភាពសហព័ន្ធយុវជនកម្ពុជានឹងរៀបចំព្រឹត្តិការណ៍អង្គរសង្ក្រាន្ត​ ២០២៥ ក្នុងខេត្តសៀមរាប ក្រោមប្រធានបទ «ញញឹមសាទរសង្ក្រាន្តឆ្នាំថ្មី»។ ក្នុងបទសម្ភាសជាមួយវិទ្យុបារាំងអន្តរជាតិ RFI នៅថ្ងៃទី២៨​ មីនានេះ លោក សោម រតនា ប្រធានក្រុម​ការងារផ្សព្វផ្សាយ និងទំនាក់ទំនងសាធារណៈនៃព្រឹត្តិការណ៍អង្គរសង្ក្រាន្តឲ្យដឹងថា ដំណើររៀបចំព្រឹត្តិការណ៍អង្គរសង្ក្រាន្ត ២០២៥ សម្រេចបានប្រមាណ ៦០ភាគរយ ខណៈការរៀបចំល្បែងប្រជាប្រិយនានានឹងត្រូវបង្កើនឲ្យច្រើនជាងលើកមុនៗ។ ទន្ទឹមគ្នានេះ និងបើតាមលោក សោម រតនា «ព្រឹត្តិការណ៍អង្គរសង្ក្រាន្ត ២០២៥» នឹងត្រូវការពារសន្តិសុខសណ្តាប់ធ្នាប់ខ្ពស់ដើម្បីបញ្ចៀសហេតុការណ៍អាក្រក់ណាមួយដែលអាចកើតមានជាយថាហេតុ។

នៅថ្ងៃទី២៧ ខែមីនា ឆ្នាំ២០២៥ គណៈកម្មាធិការជាតិប្រយុទ្ធប្រឆាំងអំពើជួញដូរមនុស្សបានបើកកិច្ចប្រជុំស្តីពីការប្រយុទ្ធប្រឆាំងអំពើជួញដូរមនុស្សឆ្នាំ២០២៤ និងលើកទិសដៅសម្រាប់ឆ្នាំ ២០២៥។ នៅក្នុងកិច្ចសម្ភាសជាមួយវិទ្យុបារាំង RFI នាថ្ងៃទី២៧ ខែមីនា ឆ្នាំ២០២៥ នេះ លោកស្រី ជូ ប៊ុនអេង រដ្ឋលេខាធិការក្រសួងមហាផ្ទៃ និងជាអនុប្រធានអចិន្ត្រៃយ៍នៃគណៈកម្មាធិការជាតិប្រយុទ្ធប្រឆាំងអំពើជួញដូរមនុស្សបានថ្លែងថា អំពើជួញដូរមនុស្សនៅក្នុងឆ្នាំ២០២៤ កន្លងទៅមានការកើនឡើងដល់ទៅ ២០% ធៀបនឹងឆ្នាំ២០២៣។ កំណើននេះត្រូវបានលោកស្រី ជូ ប៊ុនអេង បញ្ជាក់ថាគឺជាបញ្ហាប្រឈមសម្រាប់ពិភពលោក ពោលមិនចំពោះតែប្រទេសណាមួយទេ៕

គណៈ​បញ្ជាការ​បង្រ្កាប​បទ​ល្មើស​នេសាទ​របស់​កង​ទ័ព​ជើង​គោក​បាន​ឃាត់​ខ្លួន​ជន​សង្ស័យ​ចំនួន ​៤៧៨នាក់​ ក្នុង​នោះមាន​ជន​ជាតិ​វៀត​ណាម​៤៧​នាក់​ដែលបាន​ប្រព្រឹត្ត​បទ​ល្មើស​នេសាទ​នៅ​បឹង​ទន្លេ​សាប​។​ នេះ​បើតាម​របាយការណ៍​ដែល​ផ្សាយ​នៅថ្ងៃទី​២៤ ខែ​មីនា ឆ្នាំ​២០២៥ ដោយ​បាន​បន្ថែម​ថា មាន​ពលរដ្ឋ ១,១៨៧​នាក់​ទៀត​ត្រូវ​បាន​ហៅមក​អប់​រំដោយ​សារ​តែ​ការ​ប្រើ​ឧបករណ៍​នេសាទ​ខុស​ច្បាប់ ក្នុង​នោះ​មាន​ ៤៤១​នាក់​ត្រូវ​បាន​ធ្វើ​កិច្ច​សន្យា​ព្រមាន​។​ លោក​ យុក សេង ឡុង នាយក​អង្គការ​សម្ព័ន្ធ​ភាព​ដើម្បី​អភិរក្ស​ធនធាន​ជល​ផល​បាន​សាទរ​លើ​ចំណាត់​ការ​នេះ​ តែ​លោក​ចង់​ឃើញ​យុទ្ធនា​ការ​បង្ក្រាប​បទ​ល្មើស​នេសាទ​នៅ​បឹង​ទន្លេសាប​ធ្វើ​ឡើង​ជា​ប្រចាំ​នៅ​រៀង​រាល់​៦​ខែ​ម្តង​។

ករណីបង្ហៀរសំណល់រាវពីសំណាក់រោងចក្រកែច្នៃផ្លែឈើចូលក្នុងប្រភពទឹកសាធារណៈកំពុងកើតឡើងជាបន្តបន្ទាប់។ នៅស្រុករតនមណ្ឌល ខេត្តបាត់ដំបងនាដើមសប្តាហ៍នេះ រោងចក្រកែច្នៃផ្លែឈើមួយបានបង្ហៀរសំណល់រាវចូលទៅអូរត្រែងដែលធ្វើឲ្យប៉ះពាល់ដល់ការរស់នៅរបស់ប្រជាពលរដ្ឋចំនួន២ភូមិ។ នៅក្នុងបទសម្ភាសជាមួយវិទ្យុបារាំងអន្តរជាតិនាថ្ងៃអង្គារទី២៥ មីនា លោក ខ្វៃ អាទិត្យា អ្នកនាំពាក្យក្រសួងបរិស្ថានបានឲ្យដឹងថា ក្នុងរយៈពេល ២ខែចុងក្រោយនេះ ក្រសួងបានរកឃើញរោងចក្រចំនួន៩ ដែលបង្ហៀរសំណល់រាវចូលទៅប្រភពទឹកសាធារណៈ។

លោក តូច ថឹង លោក ខឿន វីរ៉ាត់ និងលោកស្រី នូ សិទ្ធារី ដែលជាមន្ត្រីជាន់ខ្ពស់គណបក្សភ្លើងទៀន និងគណបក្សឆន្ទៈខ្មែរត្រូវបានដោះលែងឲ្យមានសេរីភាពវិញនៅថ្ងៃចន្ទ ទី២៤ មីនា។ ពួកគេត្រូវបានតុលាការកាត់ទោសឲ្យជាប់ក្នុងពន្ធនាគាររយៈពេល២ឆ្នាំ និងទើបបញ្ចប់ការអនុវត្តទោស។ នៅក្នុងកិច្ចសម្ភាសជាមួយវិទ្យុបារាំងអន្តរជាតិ RFI នាថ្ងៃទី២៤ ខែមីនា ឆ្នាំ២០២៥នេះ លោក លី សុធារ៉ាយុត្តិ អគ្គលេខាធិការគណបក្សភ្លើងទៀនបានបញ្ជាក់ថា គណបក្សសម្តែងការស្វាគមន៍ដល់មន្ត្រីបក្សដែលទទួលបានសេរីភាពឡើងវិញ និងថាគណបក្សនឹងបន្តស្នើសុំឲ្យរដ្ឋាភិបាលដោះលែងមន្ត្រីរបស់ខ្លួនទាំងអស់ចំនួនជិត២០នាក់នៅក្នុងឱកាសបុណ្យចូលឆ្នាំខ្មែរខាងមុខ។

ព្រឹត្តិការណ៍សមរាត្រី ឬព្រះអាទិត្យរះចំកំពូលប្រាសាទអង្គរវត្ដ នាព្រឹកថ្ងៃទី២១ ខែមីនា ឆ្នាំ២០២៥ បានទាក់ទាញភ្ញៀវទេសចរប្រមាណជាង ២ម៉ឺននាក់។ ក្នុងបទសម្ភាសន៍ខ្លីជាមួយវិទ្យុបារាំងអន្តរជាតិ លោក ឡុង កុសល អ្នកនាំពាក្យអាជ្ញាធរជាតិអប្សារាអះអាងថាព្រឹត្តិការណ៍សមរាត្រីឆ្នាំនេះនឹងអាចទាក់ទាញភ្ញៀវទេសចរណ៍ច្រើនជាងឆ្នាំមុនៗ ខណៈសមរាត្រីនៅអង្គររដូវប្រាំងត្រូវបានរំពឹងកើតឡើង៣ថ្ងៃ ពីថ្ងៃទី ២១ រហូតដល់ថ្ងៃទី២៣មីនា។ បើតាមលោក ឡុង កុសល ការតម្លើងសេវាអ៊ីនធឺនែតនៅតំបន់អង្គរ ដោយឥតគិតថ្លៃ នៅក្នុងព្រឹត្តិការណ៍នេះជាការកត្តាមួយដែលបង្កើនការផ្សព្វផ្សាយពីភាពអស្ចារ្យនៃអង្គរវត្តខ្មែរ។

ចាប់ពីថ្ងៃទី១៩ ដល់ថ្ងៃទី២១ ខែមីនា ឆ្នាំ២០២៥ នេះ តុលាការបារាំងបានបើកសវនាការលើសំណុំរឿងគប់គ្រាប់បែកចូលហ្វូងបាតុករអហិង្សាកាលពីថ្ងៃទី៣០ ខែមីនា ឆ្នាំ១៩៩៧ ដែលបណ្តាលឲ្យមានមនុស្សស្លាប់ និងរបួសជាច្រើននាក់នៅខាងមុខរដ្ឋសភាចាស់ក្នុងប្រទេសកម្ពុជា។ ជាសវនាការដែលធ្វើឡើងតាមបណ្តឹងមេដឹកនាំបក្សប្រឆាំងលោក សម រង្ស៊ី និងបានដាក់ការសង្ស័យទៅលើមន្ត្រីយោធាជាន់ខ្ពស់២រូប ដែលគ្រប់គ្រងកងអង្គរក្សរបស់អតីតនាយករដ្ឋមន្ត្រី ហ៊ុន សែន គឺលោក ហ៊ីង ប៊ុនហៀង និងលោក ហ៊ុយ ពិសិដ្ឋ។ នៅក្នុងកិច្ចសម្ភាសជាមួយវិទ្យុបារាំង RFI នាថ្ងៃទី២០ ខែមីនា ឆ្នាំ២០២៥ នេះ លោក សុខ ឥសាន អ្នកនាំពាក្យគណបក្សប្រជាជនបានថ្លែងថា តុលាការបារាំងពុំមានយុត្តាធិការកាត់សេចក្តីពលរដ្ឋកម្ពុជា និងក៏គ្មានឥទ្ធិពលលាតសន្ធឹងលើប្រទេសកម្ពុជាដែរ៕

លោក កែវ រតនៈ រដ្ឋ​មន្ត្រី​ក្រសួង​រ៉ែ និង​ថាមពល បាន​អះអាង​ថា នៅ​រដូវ​ក្តៅ​ឆ្នាំ ២០២៥ នេះ កម្ពុជា​នឹង​មិន​ខ្វះ​អគ្គិសនី​ប្រើប្រាស់​ទៀត​ទេ និង​ថា​ក្រុម​ហ៊ុន ឬ​សហគ្រាស ឯក​ជន​ក៏មិន​ចាំបាច់​ទិញ​ម៉ាស៊ីន​ភ្លើង​មក​ត្រៀម​ទុក​ដែរ​។ ក្នុង​បទ​សម្ភាស​ជា​មួយ​វិទ្យុ​បារាំង​អន្តរ​ជាតិ​ RFI​ លោក កែវ រតនៈ បញ្ជាក់​ថា កម្ពុជា​មាន​សមត្ថ​ភាព​ផលិត​អគ្គិសនី​បាន​ជាង ៤ពាន់​មេហ្គាវ៉ាត់ និង​ដែល​តម្រូវ​ជាក់​ស្តែង​ គឺ​ប្រើអស់​តែ​ជាង ៣ពាន់​មេហ្គាវ៉ាត់​ប៉ុណ្ណោះ។​ ទោះជា​យ៉ាង​ណា លោក​ថា​កម្ពុជា​នៅ​តែ​ត្រូវ​ការ​ទិញ​អគ្គិសនី​ពី​ប្រទេស​ជិត​ខាង​ ព្រោះការ​ទិញ​អគ្គិសនី​ពី​ក្រៅគឺ​ចំណេញ​ដល់​ជាតិ​។

នៅថ្ងៃទី២១ មីនាខាងមុខ បណ្តាអង្គការសង្គមស៊ីវិលមួយចំនួនគ្រោងរៀបចំទិវាព្រៃឈើអន្តរជាតិឆ្នាំ២០២៥ ក្រោមប្រធានបទ «ការអភិរក្សព្រៃឈើដើម្បីនិរន្តរភាពសហគមន៍»។ នៅក្នុងបទសម្ភាសជាមួយវិទ្យុបារាំងអន្តរជាតិនាថ្ងៃអង្គារទី១៨ មីនា លោក សាន់ ម៉ាឡា ប្រធានកម្មវិធីបណ្តាញ និងតស៊ូមតិនៃអង្គការភាពជាដៃគូដើម្បីបរិស្ថាន និងការអភិវឌ្ឍន៍កត់សម្គាល់ថា សហគមន៍ព្រៃឈើនៅតែរងការទន្ទ្រានពីឈ្មួញខិលខូច។ ឆ្លៀតក្នុងទិវាព្រៃឈើអន្តរជាតិក្នុងឆ្នាំ ២០២៥ នេះ លោក សាន់ ម៉ាឡា ស្នើឲ្យភាគីរដ្ឋ និងអ្នកពាក់ព័ន្ធត្រូវសហការគ្នាក្នុងភាពជាមិត្តទើបការងារអភិរក្សព្រៃឈើសហគមន៍អាចមាននិរន្តរភាព។

ក្រុមអ្នកអភិរក្សអន្តរជាតិមួយក្រុមបានប្តេជ្ញាហែលទឹកតាមដងទន្លេមេគង្គចម្ងាយ១២០គីឡូម៉ែត្រ ដោយចាប់ផ្តើមហែលចេញពីទីតាំងក្បែរស្ពានមិត្តភាពកម្ពុជា-ចិន មេគង្គស្ទឹងត្រែង និងត្រូវបញ្ចប់នៅទីរួមខេត្តក្រចេះ។ ក្រុមអ្នកហែលទឹកបរទេសចំនួន ៥នាក់ដែលអមដំណើរដោយឆ្មាំទន្លេកម្ពុជានឹងចំណាយពេលហែលចំនួន ៤ថ្ងៃពីថ្ងៃទី១៧ ដល់ថ្ងៃទី២០ ខែមីនា ឆ្នាំ២០២៥។ ក្នុងកិច្ចសម្ភាសជាមួយវិទ្យុបារាំងអន្តរជាតិ RFIនៅថ្ងៃទី១៧ ខែមីនា ឆ្នាំ២០២៥នេះ លោក ម៉ែន គុង នាយករងរដ្ឋបាល និងជាអ្នកនាំពាក្យសាលាខេត្តស្ទឹងត្រែងបញ្ជាក់ថា ព្រឹត្តិការណ៍នេះនឹងធ្វើឲ្យប្រជាពលរដ្ឋ និងអ្នកពាក់ព័ន្ធយល់កាន់តែច្បាស់ពីការ ការពារសត្វផ្សោត ធនធានធម្មជាតិ និងជីវៈចម្រុះនៅតាមដងទន្លេមេគង្គ។

នៅថ្ងៃទី១៤ មីនា ធនាគារវិនិយោគអឺរ៉ុបសកល (EIB Global) សហភាពអឺរ៉ុប និងរដ្ឋាភិបាលកម្ពុជាបានដាក់ឲ្យអនុវត្តនូវគំនិតផ្តួចផ្តើមថ្មីមួយ គឺកម្មវិធីគាំទ្រសេដ្ឋកិច្ចជនបទ និងពាណិជ្ជកម្មផលិតផលកសិកម្ម (ASPIRE-AT)។ កម្មវិធីនេះមានការគាំទ្រដោយហិរញ្ញប្បទានជិត ៨០លានអឺរ៉ូ ឬប្រមាណ ៨៧ លានដុល្លាអាមេរិក) ពីសហភាពអឺរ៉ុបដែលផ្តោតជាអាទិភាពលើដំណាំកៅស៊ូ និងម្រេច។ ក្នុងបទសម្ភាសជាមួយវិទ្យុបារាំងអន្តរជាតិ RFI នៅថ្ងៃទី១៤ មីនានេះ លោកស្រី Nicola Beer អនុប្រធានធនាគារវិនិយោគអឺរ៉ុប EIB ទទួលបន្ទុកតំបន់អាស៊ីអាគ្នេយ៍បានគូសបញ្ជាក់ថា ដ្បិតកម្ពុជាត្រៀមរបូតប្រព័ន្ធអនុគ្រោះពន្ធ EBA ទាំងស្រុងក្រោយកម្ពុជាចាកចេញពីប្រទេសក្រីក្រនាពេលខាងមុខក៏ដោយក៏លោកស្រីនៅតែមានជំនឿថា ការផ្តល់ជំនួយរបស់ធនាគារវិនិយោគអឺរ៉ុបក្នុងវិស័យកសិកម្មពេលនេះនឹងជួយឱ្យកម្ពុជាបង្កើនគុណភាពកសិផលកសិកម្មដើម្បីនាំចេញទៅកាន់ទីផ្សារអន្តរជាតិ។

កម្ពុជា​ស្ថិត​ក្នុង​បញ្ជី​ព៌ណ​លឿង​ក្នុង​រដ្ឋ​បាល ​លោក ដូណាល់ ត្រាំ ដែល​កំពុង​ពិចារណា​រឹត​ត្បិត ឬ​ហាម​ឃាត់​ការ​ធ្វើ​ដំណើរ​ចូល​ទឹក​ដី​អាមេរិក ចំពោះ​ប្រជា​ពលរដ្ឋ​មក​ពី​ជាង​៤០​ប្រទេស​។ ​នេះ​បើ​តាម​ការ​ចុះផ្សាយ​របស់​កាសែត​ New York Times នៅចុង​សប្តាហ៍​នេះ​។ ​លោក មួង ណារ៉េត សកម្ម​ជន​ខ្មែរ​នៅ​ទីក្រុង​ឡុងប៊ិច លើក​ឡើង​ថា ​វិធាន​ការ​នេះ​នឹង​អាច​ទៅ​រួច ប្រសិន​បើ​រដ្ឋា​ភិបាល​កម្ពុជា​មិន​អាច​ដោះស្រាយ​លក្ខខណ្ឌ​ដែល​អាមេរិក​បាន​ដាក់​នៅ​ក្នុង​រយៈពេល​៦០​ថ្ងៃ​។​ ក្នុង​បទ​សម្ភាស​ជាមួយ​វិទ្យុ​បារាំង​អន្តរ​ជាតិ​RFI​ នៅ​ថ្ងៃ​ទី​១៦ ​ខែ​មីនា ​លោក ​មួង ណារ៉េត ​បញ្ជាក់​ថា វិធាន​ការ​ដែល​កំពុង​ស្ថិត​នៅ​ក្នុង​សេចក្តី​ព្រាង​នៅ​ឡើយ​ នឹង​អាច​ប៉ះពាល់​ខ្លាំង​ដល់​ដំណើរ​របស់​និស្សិត​ខ្មែរ​ អ្នកទេសចរ​ និង​ជន​អន្តោ​ប្រវេសន៍​ទៅ​សហរដ្ឋ​អាមេរិក​។​

លោក កែវ រតនៈ រដ្ឋមន្រ្តីក្រសួងរ៉ែ និងថាមពលបានបញ្ជាក់ថា រដ្ឋាភិបាលកម្ពុជាប្តេជ្ញាការពារមិនឲ្យមានការប៉ះពាល់រមណីយដ្ឋាន «ភ្នំឈើកាច់» ក្នុងស្រុកបាភ្នំ ខេត្តព្រៃវែងជាដាច់ខាត ខណៈតំបន់នេះត្រូវបានបង្កើតជា «តំបន់បេតិកភ័ណ្ឌធម្មជាតិ និងការកំណត់ទីតាំងបេតិកភ័ណ្ឌវប្បធម៌ប្រវត្តិសាស្ត្រ នគរភ្នំឈើកាច់បាភ្នំ»។ លោក កែវ រតនៈបានបញ្ជាក់យ៉ាងដូច្នេះនៅក្នុងបទសម្ភាសជាមួយវិទ្យុបារាំងអន្តរជាតិRFI នាថ្ងៃទី១២ ខែមីនា ឆ្នាំ២០២៥ និងស្របពេលដែលមានការផ្សព្វផ្សាយតាមបណ្តាញសង្គមខ្លះដោយចោទថា «ភ្នំឈើកាច់» ត្រូវបានអនុញ្ញាតឲ្យមានការកាយយកថ្មទៅធ្វើអាជីវកម្ម។

លោក កែវ រតនៈ ប្រធាន​ក្រុម​ការ​ងារ​ថ្នាក់​ជាតិ​របស់​រដ្ឋាភិ​បាល​ចុះជួយ​ខេត្ត​ពោធិ៍សាត់​ បាន​អះអាង​ថា ពល​រដ្ឋ ២​ភាគ​៣ បាន​យល់​ព្រម​ចាក​ចេញ​ពី​តំបន់​ផ្លូវ​អន្ទង់​អាំង ​ក្នុង​ស្រុក​ វាល​វែង​ ខេត្តពោធិ៍​សាត់ ​ដើម្បី​ទុក​ដីតំបន់​នោះ​ឲ្យ​រដ្ឋ​ដាំ​ដើម​ឈើ ​អភិរក្ស​ជា​ឧទ្យាន​ជាតិ​បៃតង​។​ ក្នុង​បទសម្ភាស​ជាមួយ​វិទ្យុ​បារាំង​អន្តរ​ជាតិ ​RFI ​នៅថ្ងៃ​ទី​១២ ខែ​មីនា លោក កែវ រតនៈ បាន​លើក​ឡើង​ថា ​ការ​ដែល​នៅមាន​ពលរដ្ឋ​ជាង​២០​គ្រួសារ​ទៀត​ក្នុង​ចំណោម ​១០០​គ្រួសារ​បន្ត​តវ៉ា​ដល់​ភ្នំពេញ​នាប៉ុន្មាន​ថ្ងៃ​នេះ ​គឺ​មិន​មែន​ដោយសារ​តែ​ពួកគេ​គ្មាន​ផ្ទះ​នៅ​បណ្តោយ​ផ្លូវ​អង្ទង់​អាំង​ទេ​ តែ​មក​ពី​ពលរដ្ឋ​ទាំង​នោះ​ត្រូវ​បាន​មនុស្ស​ផ្សេង​ទៀត​ប្រើ​ប្រាស់​ឲ្យ​ចេញ​តវ៉ា​ដើម្បី​ការពារ​ដី​ពួកគេ​ដែល​បាន​កាន់​កាប់​ខុស​ច្បាប់​។​

សិល្បករ សិល្បការិនីខ្មែរមានវត្តមាននៅក្នុងប្រទេសបារាំងពីថ្ងៃទី០៦ដល់ថ្ងៃទី១២ មីនា ដើម្បីសម្តែងរបាំព្រះរាជទ្រព្យជាថ្មី។ ពីថ្ងៃទី៨ និង៩មីនា សិល្បករ និងសិល្បិការីខ្មែរបានសម្តែងនៅសារមន្ទីរមួយក្នុងទីក្រុងប៉ារីស។ នៅក្នុងបទសម្ភាសជាមួយវិទ្យុបារាំងអន្តរជាតិ RFI នាថ្ងៃអង្គារ ទី១១ មីនានេះ លោកស្រី ភឿង សកុណា រដ្ឋមន្ត្រីក្រសួងវប្បធម៌ និងវិចិត្របានកត់សម្គាល់ពីការគាំទ្ររបស់ប្រជាពលរដ្ឋខ្មែរ និងបារាំងចំពោះការសម្តែងរបាំព្រះរាជទ្រព្យពីសំណាក់សិល្បករខ្មែរ។ តាមលោកស្រី លោកស្រី ភឿង សកុណា ការត្រឡប់ទៅសម្តែងរបាំព្រះរាជទ្រព្យនៅបារាំងជាថ្មីនេះជាជោគជ័យរបស់ជាតិកម្ពុជាទាំងមូល។