Report

នៅក្នុង​ឱកាស​ខួប​៥០ឆ្នាំ​នៃ​ការធ្លាក់ទីក្រុង​ភ្នំពេញ​ទៅក្នុង​ដៃ​របស់ទាហាន​ខ្មែរ​ក្រហម ១៧ មេសា ឆ្នាំ ១៩៧៥ វិទ្យុបារាំង​អន្តរជាតិ​មាន​សេចក្តីរាយការណ៍ បទសម្ភាសន៍​និង​បទយកការណ៍​នានា​ផ្តោតទៅលើ​ព្រឹត្តិការណ៍ប្រវត្តិសាស្រ្តដ៏សំខាន់មួយនេះ។ នៅក្នុងបទយកការណ៍​ខ្មែរ​នៅប្រទេស​បារាំង​នៅថ្ងៃនេះ ឈាង បុប្ផា​ណែនាំ​លោកអ្នកនាង​ឲ្យបាន​ស្គាល់​លោក ហ៊ុន ដារិន អតីត​ទាហាន​លន់ នល់ ដែលបានរត់គេចខ្លួន​ចេញពីប្រទេស​កម្ពុជា ​នៅថ្ងៃ​ដែល​ទាហាន​ខ្មែរ​ក្រហម​ចាប់ផ្តើម​ជម្លៀសប្រជាជន​ចេញពីទីក្រុង​ភ្នំពេញ។ លោក ហ៊ុនដារិន​បានធ្វើដំណើរ​ទៅដល់​ប្រទេស​បារាំង នៅខែ តុលា ឆ្នាំ ១៩៧៥ ប៉ុន្មានខែ​ក្រោយ​ ខ្មែរក្រហម​ចូលកាន់អំណាច​នៅ​ប្រទេស​កម្ពុជា។ នៅ​ឆ្នាំ​ដដែល លោក​បាន​ចុះឈ្មោះ​បម្រើក្នុងជួរកងទ័ពបារាំង ក្នុង​អង្គភាព légion étrangère ក្នុងនាមជា​ជនបរទេស​ដែលប្រយុទ្ធបូជាជីវិត​ដើម្បី​ជាតិ​បារាំង។

សាលារាជធានីភ្នំពេញបានចាប់ផ្ដើមរៀបចំតុបតែងសង្រ្កាន្តវត្តភ្នំដើម្បីត្រៀមអបអរពិធីបុណ្យចូលឆ្នាំថ្មីប្រពៃណីជាតិខ្មែរនៅប៉ុន្មានថ្ងៃខាងមុខ។ ការរៀបចំតុបតែងនេះមានការធ្វើប៉ាណូខ្លោងទ្វា ការរៀបចំដាក់គោមអមដោយភ្លើងពណ៌ផ្សេងៗ ព្រមទាំងការដាក់តាំងម្កុដអប្សរាដ៏ធំមួយជាដើម។ លោកស្រី ណម ណារីន ប្រធានមន្ទីរវប្បធម៌រាជធានីភ្នំពេញបានបញ្ជាក់ថា សង្រ្កាន្តវត្តភ្នំឆ្នាំនេះ គឺផ្តោតសំខាន់លើវប្បធម៌ប្រពៃណីខ្មែរជាមួយនឹងការសម្តែងទស្សនីយភាពផ្សេងៗ។ ទន្ទឹមគ្នានេះ អាជ្ញាធរក៏បានត្រៀមកម្លាំងដើម្បីការពារសុវត្ថិភាពជូនភ្ញៀវទេសចរដែរ។

សហគមន៍ក្បាលខ្លាបានព្រួយបារម្ភពីកំណើនសកម្មភាពទន្រ្ទានដីព្រៃ ការកាប់បំផ្លាញព្រៃឈើ និងការបរបាញ់សត្វព្រៃ ក្រោយពីការផ្ដាច់ជំនួយរបស់ទីភ្នាក់ងារអភិវឌ្ឍន៍អន្តរជាតិសហរដ្ឋអាមេរិក USAID ។ ជំនួយរបស់ USAID បានជួយជ្រោមជ្រែងអ្នកការពារព្រៃឈើជួរមុខ ដោយប្រើប្រាស់បច្ចេកវិទ្យា SMART Connect ដែលជាប្រព័ន្ធទិន្នន័យផ្កាយរណបសម្រាប់ត្រួតពិនិត្យតាមដានព្រៃឈើទាន់ហេតុការណ៍។ តែលោក សេង ផល្លី អនុប្រធានសហគមន៍ក្បាលខ្លាសង្ឃឹមថា អង្គការដៃគូពាក់ព័ន្ធនានាដែលធ្វើការផ្នែកការពារធនធានធម្មជាតិនឹងមិនបោះបង់សហគមន៍ក្បាលខ្លាទេ។

ក្នុងរយៈពេល២ថ្ងៃពីថ្ងៃទី១ ដល់ថ្ងៃទី២ ខែមេសា ឆ្នាំ២០២៥ កម្មវិធីសង្ក្រានសាលាមធ្យមវិចិត្រសិល្បៈក្នុងសង្កាត់ភ្នំពេញថ្មីដែលមានការសម្តែងសិល្បៈទស្សនីយភាពគ្រប់ទម្រង់ កម្មវិធីពិព័រណ៌ ការលេងល្បែងប្រជាប្រិយខ្មែរ រួមទាំងការប្រគុំតន្រ្តី និងរបាំទំនើបចម្រុះបានបើកសម្ពោធយ៉ាងអធិកអធមតាំងពីព្រឹកថ្ងៃទី១ មេសាដើម្បីអបអរសាទរដល់ពិធីបុណ្យចូលឆ្នាំខ្មែរខាងមុខ។

លោក ញ៉ឹម ឆាយឡុង និស្សិតកំពុងសិក្សាជំនាញមេកានិកបានឆ្លៀតពេលទំនេរពីការសិក្សាដើម្បីគូរគំនូររូបត្លុកនៅខាងមុខព្រះបរមរាជវាំងនៅរៀងរាល់ចុងសប្តាហ៍។ លោកចូលចិត្តគូរគំនូរបែបនេះតាំងពីក្មេងដោយសិក្សាស្វែងយល់ខ្លួនឯងបន្ថែមតាមរយៈការមើលវីដេអូក្នុងយូធូប។ សម្រាប់លោក ញ៉ឹម ឆាយឡុង ការគូរគំនូរត្លុកនេះបង្ហាញពីសេរីភាពដែលកើតចេញពីគំនិតច្នៃប្រឌិត។ តែលោករំពឹងនឹងទទួលបានការគាំទ្រច្រើនពីសាធារណជន។

ថ្ងៃទី៣០ មីនា ឆ្នាំ ២០២៥ នេះជាខួប ២៨ឆ្នាំនៃព្រឹត្តិការណ៍គប់គ្រាប់បែកដៃចំនួន ៤គ្រាប់នៅខាងមុខអគាររដ្ឋសភាកាលពីថ្ងៃទី៣០ មីនា ឆ្នាំ ១៩៩៧។ ព្រឹត្តិការណ៍កាលណោះបានបណ្តាលឲ្យស្លាប់មនុស្ស ១៦នាក់ និងរបួសជាង ១០០នាក់។ នៅព្រឹកថ្ងៃទី៣០ មីនា ឆ្នាំ២០២៥ដែលជាខួបគម្រប់ ២៨ឆ្នាំ មានការជួបជុំគ្នាតាមបែបព្រះពុទ្ធសាសនាដូចរៀងរាល់ឆ្នាំនៅមុខចេតិយមួយកន្លែងក្បែរវត្តបទុមវតីដែលជាទីតម្កល់អដិ្ឋធាតុជនរងគ្រោះ។ គណបក្សក្រៅរដ្ឋាភិបាលមួយចំនួនដែលមានវត្តមាននៅក្នុងពិធីរំលឹកវិញ្ញាណក្ខន្ធលើកឡើងថា ពួកគេមិនអាចភ្លេចព្រឹត្តិការណ៍ថ្ងៃទី៣០ មីនា ឆ្នាំ ១៩៩៧ និងបន្តអំពាវនាវឲ្យរដ្ឋាភិបាលស្វែងរកឃាតករទៅកាត់ទោស។

អ្នក​ឧក​ញ៉ា សំ សុខនឿន​ គឺ​ជា​ប្រធាន​សម្ព័ន្ធ​ក្រុម​ហ៊ុន​ SAM SN Group ​ដែល​វិនិយោគ​លើ​អចន​ទ្រព្យ​នៅកម្ពុជា​។​ លោក​ចាប់​ផ្តើម​ចូល​ប្រឡូក​ក្នុង​វិស័យ​នេះ ​តាំង​ពី​អំឡុង​ឆ្នាំ​២០០៨​ ពោល​តាំង​ពី​នៅ​សិក្សា​ថ្នាក់​បរិញ្ញា​បត្រ​នៅ​ឡើយ​។ ​មាន​អាយុ​៣៨​ឆ្នាំ ​លោក សំ សុខនឿន បាន​បញ្ចប់​ថ្នាក់​បណ្ឌិត​ពី​ប្រទេស​អង់​គ្លេស ​និង​ទទួល​បាន​ជោគ​ជ័យ​ផ្នែក​អចលន​ទ្រព្យ​ ដោយ​ចាប់​ផ្តើម​តាំង​ពី​ជិះ​ទូក​ដើរ​ទិញ​ដី​។

ប្រជាសហគមន៍ក្បាលខ្លាក្នុងឃុំសណ្ដាន់ ស្រុកសណ្ដាន់ ខេត្តកំពង់ធំបានចំណាយពេលវេលាការពារព្រៃឈើដើម្បីទុកជាមរតកធម្មជាតិ និងវប្បធម៌សម្រាប់ជនជាតិដើមភាគតិចកួយជំនាន់ក្រោយ។ លោក គង់ សុខា សមាជិកគណៈកម្មការព្រៃសហគមន៍ក្បាលខ្លាបានកត់សម្គាល់ឃើញថា ក្នុងរយៈពេលមួយឆ្នាំចុងក្រោយនេះ សហគមន៍មានទំនាក់ទំនងល្អជាមួយអាជ្ញាធរមូលដ្ឋាន និងសង្កាត់រដ្ឋបាលព្រៃឈើសណ្ដាន់។ការណ៍នេះបានធ្វើឲ្យជនល្មើសខ្លាចរអា និងបទល្មើសព្រៃឈើមានការថយចុះច្រើន៕

នៅ​សល់រយៈពេល​តែ​១ខែគត់ សារមន្ទីរជាតិបារាំង​ហ្គីមេនៅទីក្រុង​ប៉ារីស​នឹងបើកពិព័រណ៌​ដ៏ធំ​ ដែល​មាន​ប្រតិមា​ព្រះវិស្ណុផ្ទំ​ធ្វើពីសំរិទ្ធិជាតួអង្គឯក។ នៅក្រោយ​ការសិក្សាវិភាគ នៅ​មជ្ឈមណ្ឌល​ស្រាវជ្រាវ​របស់​សារមន្ទីរ​នៃប្រទេស​បារាំងក្នុងទីក្រុង​ប៉ារីស និងជួសជុល​នៅ មន្ទីរពិសោធន៍​ អាក់ កង់ទិកArc’Antique ព្រះវិស្ណុផ្ទំ​មកពីប្រាសាទមេបុណ្យខាងលិចនឹងត្រូវ​ដាក់តាំងបង្ហាញជាមួយ​វត្ថុបុរាណធ្វើពីសំរិទ្ធ​ចំនួន​១២៦ ផ្ញើមកពីសារមន្ទីរជាតិកម្ពុជា​​ នៅក្នុង​សារមន្ទីជាតិបារាំង ហ្គីមេ។ ហ្គីមេ​ជា​សារមន្ទីរតាំងវត្ថុបុរាណអាស៊ី សំខាន់ ធំជាងគេ​នៅទឹកដីអឺរ៉ុប។ ហ្គីមេក៏ជាសារមន្ទីរធំជាងគេ​នៅទឹកដីបរទេស ដែលមាន​វត្ថុបុរាណ ប្រតិមា​ខ្មែរច្រើនជាងគេ។ ដូច្នេះ សារមន្ទីររបស់​បារាំងមួយនេះ ជៀសមិនផុត​ពីភ្លើងហ្វារិះគន់ ឬ​លឺ​ពាក្យសំដី​ដែលទាមទារ​ឲ្យ​សារមន្ទីរ​ត្រូវ​ប្រគល់​វត្ថុបុរាណ​ទៅ​ឲ្យ​ប្រទេស​ដើម គឺ​កម្ពុជា។ បើតាម​លោក​ព្យែរ បាទីស្ទ ប្រវត្តិវិទូ និងជា ប្រធានអភិរក្សនៅ​សារមន្ទីរហ្គីមេ សារមន្ទីរបារាំង​មិនអាច​ប្រគល់​វត្ថុបុរាណ​ខ្មែរ​ទៅ​ឲ្យ​កម្ពុជា​វិញបានទេ។ តើអ្វីជាមូលហេតុ? យើង​ស្តាប់​បទយកការណ៍ ដែលនៅក្នុង​នោះ ឈាង បុប្ផា​បានជួបសម្ភាសន៍ លោក​ព្យែរ បាទីស្ទ នៅ​សារមន្ទីរហ្គីមេ ក្នុងទីក្រុង​ប៉ារីស

នៅខេត្តបាត់ដំបង ផ្សារមួយកន្លែងឈ្មោះ «ផ្សារប្រហុក» គឺជាទីតាំងកែច្នៃត្រីប្រហុក ផ្អកធំជាងគេសម្រាប់ផ្គត់ផ្គង់ទីផ្សារក្នុងស្រុក។ អាជីវករលក់ផ្អកត្រីប្រាក្នុងផ្សារប្រហុកបានប្រាប់វិទ្យុបារាំងអន្តរជាតិ RFI ថា ពួកអាចលក់ផ្អកពាក់កណ្តាលសម្រេចបានប្រមាណពី ២ ទៅ៣តោនក្នុងមួយថ្ងៃ។ តែទោះជាយ៉ាងនេះក្តី ពួកគេបានលើកឡើងពីទីផ្សារលក់ផ្អកហាក់នៅមានកម្រិត និងបានអំពាវនាវឲ្យពលរដ្ឋជួយទិញគាំទ្រ និងទិញផលិតផលក្នុងស្រុក។

កសិករនៅភូមិកោះក្របី សង្កាត់ព្រែកថ្មី ខណ្ឌច្បារអំពៅ រាជធានីភ្នំពេញបានត្អួញត្អែរពីការធ្លាក់ចុះនូវទិន្នផលផ្កាម្លិះក្នុងរយៈពេលប៉ុន្មានខែចុងក្រោយនេះ។ តាមកសិករ ការធ្លាក់ចុះនេះបណ្ដាលមកពីការប្រែប្រួលអាកាសធាតុ និងសត្វល្អិតបំផ្លាញ។ តែកសិករថា ទោះទិន្នផលផ្កាធ្លាក់ចុះក៏តម្លៃផ្កាបានកើនឡើងខ្ពស់ និងមិនខ្វះទីផ្សារលក់ចេញដែរ។

សាលាសិល្បៈសម្ដែងថ្មីមួយដែលមានឈ្មោះ The Acting Art Academy កំពុងរួមកិច្ចសហការជាមួយវិទ្យាស្ថានបារាំងនៅកម្ពុជា និងFactory Phnom Penh ដើម្បីត្រៀមបង្កើតមហោស្រពសិល្បៈសម្ដែងទស្សនីយភាព Golden (R)Age ឆ្នាំសូន្យ ជាលើកដំបូងនៅក្នុងទីក្រុងភ្នំពេញ។ មហោស្រពសិល្បៈសម្ដែង Golden (R)Age ដែលមានរួមបញ្ចូលស្នាដៃសិល្បៈទស្សនីយភាពថ្មីៗបែបចម្រុះចំនួន ៧ នឹងធ្វើការសម្តែងនៅទីក្រុងភ្នំពេញក្នុងរយៈពេល ២អាទិត្យចាប់ពីថ្ងៃទី២៨ ខែមិនា ដល់ថ្ងៃទី៨ ខែមេសា ឆ្នាំ២០២៥។

នៅថ្ងៃទី២២មីនា ពិធីបុណ្យអាហារឆ្នាំ ២០២៥ដែលរៀបចំឡើងនៅផ្លូវថ្មើរជើងក្នុងក្រុងភ្នំពេញបានដាក់តាំងបង្ហាញម្ហូបអាហារជាច្រើនមុខពីបណ្ដាប្រទេសនៅតាមតំបន់ទន្លេមេគង្គ និងទន្លេគង្គា។ ក្នុងនោះមានអាហារឡាវ ភូមា ថៃ វៀតណាម កម្ពុជា និងឥណ្ឌាជាដើម។ អ្នកទេសចររីករាយនឹងការទទួលទានអាហារក្នុងឱកាសបែបនេះ តែពួកគេចង់ឱ្យមានការរៀបចំតុ និងកៅអីសម្រាប់អ្នកទទួលទានឱ្យបានគ្រប់គ្រាន់ បើសិនមានពិព័រណ៍អាហារបែបនេះលើកក្រោយ។

ពិព័រណ៌រូបថតរបស់និស្សិតទាំង២១នាក់ នៃសាលាថតរូប Studio Images ក្រោមប្រធានបទ «ភាពចម្រុះនៃ ២១ចក្ខុ» បាន និងកំពុងដាក់តាំងបង្ហាញចាប់ពីថ្ងៃទី១៨ មីនា ដល់ថ្ងៃទី៣០ មេសា ឆ្នាំ២០២៥។ ពិព័រណ៌នេះមានបង្ហាញនូវរូបថតរាប់សិបសន្លឹកដែលក្រុមនិស្សិតបានចុះថតផ្ទាល់ពីទិដ្ឋភាពសង្គមនៅតាមតំបន់ផ្សេងៗគ្នាក្នុងប្រទេសកម្ពុជា។ ពួកគេបានលើកឡើងពីការចំណាយពេលវេលា និងការសិក្សាបានច្បាស់លាស់ពីបច្ចេកទេសនៃការកាន់កាមេរ៉ាថត។

នៅថ្ងៃទី២១ ខែមីនា ឆ្នាំ២០២៥នេះ សង្គមស៊ីវិលដែលធ្វើកិច្ចការទាក់ទងនឹងព្រៃឈើបានប្ដេជ្ញាចិត្តរួមគ្នា ស្ដារគម្របព្រៃឡើងវិញ បន្ទាប់ពីព្រៃឈើនៅកម្ពុជារងការបំផ្លិចបំផ្លាញ។ នៅក្នុងការចូលរួមស្ដារគម្របព្រៃឈើក្នុងឆ្នាំ២០២៥នេះ សង្គមស៊ីវិលទាំងនោះបញ្ជាក់ថា ពួកគេនឹងកៀរគរ កម្លាំងយុវជនឱ្យចូលរួមថែរក្សា និងតាមដានយ៉ាងយកចិត្តទុកដាក់ ពិសេសចែកចាយកូនឈើទៅកាន់តំបន់ដែលរងភាពរិចរិល។ ចំណែកក្រសួងបរិស្ថានអះអាងថា ក្រសួងនឹងអនុវត្តផែនការដាំដើមឈើឱ្យបានយ៉ាងហោចណាស់១លានដើមក្នុងមួយឆ្នាំ។

សមាគមបណ្តាញយុវជនកម្ពុជា( CYN)បានជ្រើសរើសយកយុវជន ៦០នាក់ពីសកលវិទ្យាល័យផ្សេងៗគ្នាក្នុងរាជធានីភ្នំពេញ និងបណ្ដាខេត្តមួយចំនួនឲ្យចូលរួមនៅក្នុងកម្មវិធីបោះជំរំពីថ្ងៃទី ១៤ ដល់ ១៧ ខែមីនា ឆ្នាំ២០២៥ នៅព្រៃសហគមន៍ក្បាលខ្លា ក្នុងស្រុកសណ្ដាន់ ខេត្តកំពង់ធំ។ កម្មវិធីនេះធ្វើឡើងក្នុងគោលបំណងពង្រឹងសមត្ថភាព និងការចូលរួមរបស់យុវជន សហគមន៍ និងអាជ្ញាធរដើម្បីអភិរក្ស និងការពារព្រៃឈើ។

នៅថ្ងៃទី១៨ ខែមីនា ឆ្នាំ២០២៥ ពលរដ្ឋរស់នៅតាមបណ្ដោយផ្លូវរថភ្លើងក្នុងខណ្ឌទួលគោក និងខណ្ឌដូនពេញ រាជធានីភ្នំពេញបានទៅតាមដានលិខិតអន្តរាគមន៍នៅសាលាក្រុងស្តីពីផលប៉ះពាល់គម្រោងអភិវឌ្ឍន៍ផ្លូវរថភ្លើងថ្មី។ ពួកគេបានអះអាងថា ការឡើងមកតាមដានលិខិតដល់សាលាក្រុងនេះដោយសារតែពួកគេនៅមិនទាន់ទទួលបានសំណងខូចខាតនៅឡើយ ខណៈគម្រោងអភិវឌ្ឍន៍ផ្លូវរថភ្លើងនេះនឹងចាប់ផ្តើមក្នុងពេលឆាប់ៗខាងមុខ។ តែរដ្ឋបាលសាលាក្រុងភ្នំពេញបានបញ្ជាក់ថា អាជ្ញាធរបានចុះទៅសិក្សាពីផលប៉ះពាល់ ដោយសន្យាដោះស្រាយសំណងតាមការស្នើសុំរបស់ពលរដ្ឋ៕

ស្ថិតនៅចម្ងាយ១៧គីឡូម៉ែត្រពីកណ្តាលរាជធានីភ្នំពេញ វាលពិឃាតជើងឯកក្នុងរបបកម្ពុជាប្រជាធិបតេយ្យខ្មែរក្រហមបានក្លាយជាទីតាំងសិក្សាប្រវត្តិសាស្ត្រមួយរបស់កម្ពុជាដោយមានឈ្មោះជាផ្លូវការថា «មជ្ឈមណ្ឌលប្រល័យពូជសាសន៍ជើងឯក»។ទីតាំងនេះត្រូវបានរៀបចំឡើង កាលពីឆ្នាំ១៩៨០ និងមានអដិ្ឋធាតុជនរងគ្រោះរាប់ពាន់នាក់។ លោកស្រី រស់ សុភារ៉ាវី ប្រធានគ្រប់គ្រងមជ្ឈមណ្ឌលប្រល័យពូជសាសន៍ជើងឯកបាននិយាយប្រាប់វិទ្យុបារាំងអន្តរជាតិ RFI​ ថា វាលពិឃាតជើងឯកបាននិងកំពុងបើកទទួលស្វាគមន៍ភ្ញៀវជាតិនិងអន្តរជាតិ ដើម្បីសិក្សាស្វែងយល់ពីប្រវត្តិសាស្ត្រដ៏ជូរចត់របស់ពលរដ្ឋកម្ពុជា ដែលត្រូវពួកខ្មែរក្រហមសម្លាប់យ៉ាងរង្គាលកាលពី៥០ឆ្នាំមុន។

ក្នុងគោលបំណងនៃការលើកកម្ពស់ដល់ការអប់រំផ្នែកច្បាប់ និងចែករំលែកការយល់ដឹងអំពីសិទ្ធិមនុស្សនៅក្នុងសហគមន៍ ក្រុមយុវជនកម្ពុជាមួយក្រុមកំពុងបង្កើតកម្មវិធីវេទិកា ”សិទ្ធិខ្ញុំ” ដែលនឹងមានការសម្តែងសិល្បៈទស្សនីយភាពល្ខោនបុរាណខ្មែររឿង “ប៊ុត សុម៉ាលី មុន្នីវត្តី” និងក៏មានការពិភាក្សាលើប្រធានបទច្បាប់ស្តីពី ”ការព្រមព្រៀង” នៅក្នុង និងក្រៅចំណងអាពាហ៍ពិពាហ៍។ គម្រោងទស្សនីយភាពនេះនឹងត្រូវសម្តែងជាសាធារណៈដោយឥតគិតថ្លៃនៅក្នុងទីតាំង MC Park រាជធានីភ្នំពេញ នាថ្ងៃទី២២ ខែមីនា ឆ្នាំ២០២៥។

លោក ប៉ិល សម្បត្តិ ម្ចាស់កសិដ្ឋាន២២៨ បាននាំចូលពូជមាន់បរទេសច្រើនប្រភេទមកចិញ្ចឹមក្នុងកសិដ្ឋានរបស់លោក ក្នុងនោះមានមាន់ជើងធំម្យ៉ាងពីប្រទេសវៀតណាម។ បើតាមម្ចាស់កសិដ្ឋានរូបនេះ គេកម្រឃើញពូជមាន់ប្រភេទនេះណាស់ នៅក្នុងប្រទេសកម្ពុជា ដោយហេតុថា មាន់នេះមានតម្លៃថ្លៃ និងតម្រូវឲ្យមានបច្ចេកទេសបង្កាត់ពូជត្រឹមត្រូវ។ លោក ប៉ិល សម្បត្តិពន្យល់ថា ទីផ្សារមាន់ជើងធំនៅកម្ពុជាបច្ចុប្បន្ន មានភាពតូចចង្អៀតនៅឡើយ ហើយភាគច្រើន គេយកទៅចិញ្ចឹមជាសត្វលម្អតាមផ្ទះ រីសត សណ្ឋាគារ និងរមណីយដ្ឋានជាដើម។